مقابلة لاعبنا مهند ابراهيم ببرنامج صدى الملاعب
موقع اللاعبين السوريين المحترفين في March 26 2009 21:14:55
صورة لمهند ابراهيم من مباراة الاتفاق الاخيرة ضد الاهلي
تحدث لاعبنا السوري الخلوق مهند ابراهيم لاعب نادي الاتفاق السعودي بشكل مطول عن موضوع احترافه بنادي الاتفاق وسبب عدم مشاركته كاساسي, وعن رايه بالمستوى الذي قدمه في النادي السعودي منذ انضمامه للفريق حتى الان.
وذلك بحديث مطول للابراهيم في برنامج صدى الملاعب الذي يبث على قناة MBC والذي يقدمه المعلق السوري مصطفى الاغا, حيث قام مراسل البرنامج ماجد التويجري باجراء لقاء مطول مع اللاعب عرض على جزاين في البرنامج اليكم التفاصيل كاملة:
الجزء الاول عرض يوم الثلاثاء :
ماجد التويجري: بالتأكيد يعني جمهورك في سوريا وحتى جمهور الاتفاق يمكن أنت ما ظهرت كثير على الشاشة، ومن خلال صدى الملاعب بدي أعرف كيف اخترت وقررت أنك تجي للاحتراف في الدوري السعودي مع نادي الاتفاق؟
مهند إبراهيم: بسم الله الرحمن الرحيم، أنا أول شي كنت ملتزم مع نادي الكرامة بمعسكر بدبي، وكنت عم جهز حالي كنت مسافر على التشيك كان عندي عقد من النادي التشيكي، وأنا بالمعسكر أجاني عقد من نادي الاتفاق. كلمنا النادي بالموضوع وأنا ما ترددت أبداً يعني بقبول العقد لأنه يعني كان أنا عندي طموح كبير أني ألعب بالدوري السعودي الدوري السعودي أقوى دوري عربي، يعني نادي الاتفاق من الأندية المعروفة يعني عالساحة العربية له إنجازات وله بطولات كتير تشجعت أني خوضها هالمرحلة مع نادي الاتفاق، الحمد لله رب العالمين وافقت والنادي ما وقف بطريقي يعني خاصة أنا ملتزم معهم بعقد سنتين جايات، الحمد لله رب العالمين صار الوفاق بين الناديين وأنا كنت راضي.
ماجد التويجري: بالتأكيد الواحد كابتن وهو بعيد شي ولما يعيش الجو من الداخل شي آخر، شو اللي اختلف عندك مهند لما جيت للاتفاق وشفت الاتفاق ولعبت مع الاتفاق، وهلأ بتلعب بدوري أبطال آسيا وهيك شغلات كثيرة، شو اللي اختلف عندك؟
مهند إبراهيم: اختلف عندي أول شي أنا يعني صارت المسؤولية لي أكبر..
ماجد التويجري: لأ أقصد ظلت هي نفس القناعة اللي موجودة عندك أنه الدوري السعودي هو الأقوى؟
مهند إبراهيم: أكيد حتى أنه صرت أحس بصعوبته أكتر مما كنت أتابعه، وقت كنت تتابعه كنت تشوف يعني بس ما كنت حاسس بالصعوبة، يعني بس هلأ وقت تيجي تلعب أنت بالدوري السعودي يعني وتواجه لاعبين على مستوى عالي وتواجه فرق ومدربين يعني بتلاقي صعوبة أكبر بتحاول أنك تعطي يعني أد طاقتك مرتين.
ماجد التويجري: بتعتقد ممكن تكون الاتفاق محطة أولى لك، ممكن تجد نفسك في نادي يعني أنا يعني ما بقلل من الاتفاق بس يعني ممكن تلعب للهلال تلعب للاتحاد هدول الناديين اللي يمكن يكونوا الآن الأبرز في الدوري السعودي؟
مهند إبراهيم: أكيد يعني أنا طموحي أنه يعني أتوفق بهاي التجربة الاحترافية، وتكون هي يعني فاتحة خير بالنسبة لإلي بالاحتراف الخارجي.
ماجد التويجري: حسيتها هيك كابتن.
مهند إبراهيم: حست الحمد لله رب العالمين يعني أنا مشاركاتي كانت قليلة لسه مع نادي الاتفاق، لأنه أجيت فترة قصيرة وأول تجربة احترافية لي، وحسيت أنه الحمد لله رب العالمين رضا إدارة النادي عني رضا الجماهير يعني عليّ، أنه قالت أنه قدم مستوى مقبول بالفترة اللي شارك فيها بالمباريات أو الفترة القصيرة اللي انا أجيت فيها. شفت عندك لاعبين مثلاً على مستوى عالي عم يجوا على الدوري السعودي مثلاً ما عم يقدروا يثبتوا حالهم بمباراة واثنتين وثلاثة وأربعة بعدين لحتى يدخلوا بالجو ويعطوا كل شي عندهم، فما بالك يعني أنا لاعب لسه أول تجربة احترافية وأُعد صغير في الاحتراف ولسه ما لعبت مع نادي الاتفاق.
ماجد التويجري: أديش عمرك كابتن؟
مهند إبراهيم: أنا 23..
ماجد التويجري: ما شاء الله، طيب كابتن أنت تقول أن جاني عرض في التشيك، التشيك هي في الواقع الأمر هي محطة أوروبية، يمكن اليوم تحترف في الدوري التشيكي ممكن تلاقي نفسك بترفع شوي على السويسري بتروح شوي على مثلاً الفرنسي وبعد هيك على الإنجليزي، ليه اخترت السعودية؟
مهند إبراهيم: لأنه أنا حابب أني أكون ماني حابب برات الدول العربية، يعني هلأ الدوري التشيكي دوري أوروبي بس يعني ما فيك تعده من أقوى الدوريات الأوروبية عرفت شلون الدوري التشيكي دوري عادي.
ماجد التويجري: بس كابتن محطة أولى، اليوم علي الحبسي راح النرويج وبعدين علي الحبسي يلعب بولتون الإنجليزي يلعب في أقوى دوري في العالم، هيك بدك تفكر؟
مهند إبراهيم: مزبوط بس أنا تجربتي مع النادي التشيكي يعني يمكن كانت أنه فيها فترة تجربة، عرفت شلون بعد ما شافوني بغرب آسيا طلبوني لفترة تجربة المدرب..
ماجد التويجري: رفضت هالمبدأ؟
مهند إبراهيم: رفضت المبدأ أنا أكيد..
ماجد التويجري: ليه هالقد عندك ثقة بإمكانياتك؟
مهند إبراهيم: أنا عندي ثقة بإمكانيتي الحمد لله رب العالمين، ومالي حابب أني أخوض التجربة أنه يمكن تأثر علي أنا بداية طريقي لساتني لاعب صغير، يمكن إذا ما نجحت فيها يعني تسبب لي شي عكسي بالنسبة لإلي يعني أنه تحس حالي أنه إمكانياتي قليلة أو ضاعت ثقتي بنفسي، بس الحمد لله وقت رب العالمين أكرمني يعني بعقد نادي الاتفاق بنفس اليوم اللي كنت مسافر فيه على التشيك، بنفس اليوم كنت مسافر كان.. سبحان الله كان فريق الكرامة عنده مباراة بنفس اليوم أنا ما رحت معهم ضليت بالفندق ضبيت أغراضي بدي سافر، وقت رجعوا قالوا لي على عقد الاتفاق
الجزء الثاني الذي عرض يوم امس الاربعاء:وتحدث الابراهيم في الجزء الثاني من اللقاء عن طموحاته المستقبلية حيث اكد انه يرغب ان يصبح رئيس الاتحاد الرياضي العام في المستقبل, كما وصف الدوري السوري بالدوري الضعيف اعلامياً, واكد انه بحسب رايه الشخصي ان حارس نادي الكرامة مصعب بلحوس هو افضل لاعب في سوريا حالياً, وان اللاعب السعودي محمد نور افضل لاعب بالسعودي,و اضاف مهند ابراهيم ان لديه طموح كبير باللعب للاتحاد و الهلال والشباب والنصر او البقاء بالاتفاق.